Eldur í bíl og nokkur innbrot í dag

Nokkur erill hefur veirð hjá lögreglunni á höfuðborgarsvæðinu það sem af er degi. Í tilkynningu frá lögreglu segir meðal annars að tilkynnt hafi verið um eld í bifreið á Höfðabakka á móts við Árbæjarsafn í morgun. Greiðlega gekk að slökkva eldinn af viðbragðsaðilum en bifreiðin er mikið skemmd eftir eldinn.

Þá voru rúður brotnar í Víkurskóla í dag en ekki er vitað hverjir voru þar að verki. Þá var tilkynnt um yfirstandandi innbrot í Kópavogi þar sem sást til tveggja manna yfirgefa vettvanginn með mun sem ætla má að sé þýfi. Lögregla handtók mann vegna málsins og dvelur hann nú í fangageymslu og bíður yfirheyrslu, um var að ræða aðila sem er þekktur hjá lögreglu.

Þá var tilkynnt um sjö önnur innbrot víðsvegar um borgina í dag og eina innbrotstilraun en þar kom aðili að fólki sem lagði á flótta þegar það varð hans vart. Rannsóknardeildin er með málin til rannsóknar.