Ferðamaður gómaður utanvegar

Lögreglan á Hvolsvelli fékk tilkynningu um utanvegaakstur á erlendri bifreið á Sprengisandsleið í gær.

Tilkynnandi sagði bifreiðina á leið norður Sprengisand. Haft var samband við hálendisvakt Landsbjargar sem fann bifreiðina og fylgdi henni til byggða.

Þar tóku lögreglumenn frá Akureyri á móti bifreiðinni og færðu ökumann hennar á lögreglustöðina á Akureyri þar sem honum var gert að greiða sekt, sem var á annað hundrað þúsund, vegna athæfisins.

Ökumaðurinn var ferðamaður á fertugsaldri og greiddi hann sektina.

Lögreglan vill hvetja þá sem vitni verða að utanvegaakstri til þess að taka ljósmyndir af gerendum og vettvangi og tilkynna til lögreglunnar í því umdæmi sem það er staðsett í.