Guðbjörg Jóhannesdóttir nýr prestur í Hafnarfirði

Guðbjörg Jóhannesdóttir hefur verið valin prestur í Hafnarfjarðarprestakalli en embættið veitist frá 1.október næstkomandi. Þetta kemur fram í tilkynningu frá Biskupsstofu.

Guðbjörg Jóhannesdóttir vígðist til Sauðárkróksprestakalls 5. ágúst 1998. Hún þjónaði þar í níu ár eða til hausts 2007. Frá þeim tíma hefur hún m.a. þjónað í Háteigskirkju, Selfosskirkju og Neskirkju.

Guðbjörg er með MA próf í sáttamiðlun og átakastjórnun frá Háskólanum í Kaupmannahöfn auk þess að hafa aflað sér víðtækrar símenntunar á sviðum er snerta prestsþjónustu og guðfræði.

Átta umsækjendur voru um embættið. Biskup Íslands skipar í embættið til fimm ára að fenginni umsögn valnefndar. Valnefnd skipuðu níu fulltrúar Hafnarfjarðarprestakalls ásamt prófasti Kjalarnessprófastsdæmis.