Frestur til að sækja um forstjórastöðu FME rennur út

Nú fer hver að verða síðastur til að sækja um forstjórastöðu Fjármálaeftirlitsins en umsóknarfrestur rennur út á morgun. Staðan var auglýst til umsóknar 11. febrúar og var fresturinn í fyrstu til 25. febrúar en hann var framlengdur til 11. mars.

Jónas Fr. Jónsson gerði starfslokasamning sem forstjóri Fjármálaeftirlitsins eftir að Björgvin G. Sigurðsson sagði af sér sem viðskiptaráðherra í lok janúar. Ragnar Hafliðason, aðstoðarforstjóri, var í framhaldinu falið að fara með ákvörðunarvald hjá stofnuninni.

Þegar samið var um starfslok Jónasar var ákveðið að hann myndi starfa til 1. mars. Seinasti dagur hans í Fjármálaeftirlitinu var föstudaginn 27. febrúar.

Fram kom í auglýsingu að forstjóri Fjármálaeftirlitsins skuli hafa menntun á háskólastigi og auk þess búa yfir víðtækri þekkingu og starfsreynslu á fjármálamarkaði. Jafnframt var talið æskilegt að viðkomandi hafi reynslu af alþjóðlegu samstarfi, búi yfir afar góðri ensku kunnáttu og hafi auk þess reynslu af störfum sem stjórnandi.

Mánaðarlaun Jónasar voru 1,7 milljón. Hann fær 20,4 milljónir króna á 12 mánaða uppsagnarfresti.