Þinglýstir kaupsamningar þrefalt færri en í fyrra

Fjöldi þinglýstra kaupsamninga á höfuðborgarsvæðinu í síðustu viku var 39, um þrefalt færri en á sama tíma í fyrra. Fasteignamarkaðurinn hefur verið svo til frosinn síðustu mánuði og náði sögulegu lágmarki í lok síðasta árs þegar gerðir voru 13 kaupsamningar á höfuðborgarsvæðinu vikuna fyrir áramót.

Samkvæmt fasteignamati ríkisins voru 39 kaupsamningum þinglýst á höfuðborgarsvæðinu í síðustu viku. Til samanburðar má nefna að á sama tíma í fyrra var 104 samningum þinglýst og 175 árið 2007. Ætla má að nokkuð sé um makaskipti á fasteignum inni í þessari tölu en þá telja ein og sömu viðskiptin 2 þinglýsta kaupsamninga.

Flestir samningarnir voru um eignir í fjölbýli og var meðalupphæð á samning 28,9 milljónir króna. Þrátt fyrir að stór hluti landsmanna eigi í erfiðleikum með að standa í skilum á húsnæðislánum sem hafa hækkað mikið síðustu mánuði annars vegar vegna veikingar krónunnar og hins vegar vegna hárrar verðbólgu hefur ekki orðið fjölgun á nauðungaruppboðum á fasteignum hjá sýslumanninum í Reykjavík.