Icesave: 1600 Bretar eiga eftir að gera kröfu

Nú er að renna upp síðasta tækifæri fyrir þá Breta sem áttu innistæður á Icesave reikningum Landsbankans að gera kröfur sínar ljósar. Breska ríkisútvarpið segir frá þessu í dag en í ljósi þess að samningar hafa náðst í Icesave deilunni fer hver að verða síðastur til þess að krefjast þess að fá innistæður sínar til baka.

Engir Bretar ættu að tapa inneignum sínum í bankanum en þeir þurfa að lýsa yfir kröfu ætli þeir sér að fá peningana sína til baka. Að sögn BBC eiga tæplega 1600 reikningseigendur enn eftir að láta vita af sér. Innistæðutryggingasjóðurinn í Bretlandi er nú að vinna úr málunum og mun hann skila inn lokauppgjöri til íslenska tryggingasjóðsins þann 30. október næstkomandi.

Í frétt BBC er tekið fram að meirihluti þeirra sem eiga eftir að lýsa kröfu í vegna Icesave eigi aðeins lágar fjárhæðir inni á reikningum, oft er um 20 pund eða minna að ræða. Því er líklegt að margir hafi metið það sem svo að það sé ekki fyrirhafnarinnar virði að gera veður útaf svo lágum upphæðum. Allt í allt áttu um 400 þúsund Bretar innistæður á Icesave reikningum.