Hátíðardagskrá Ögmundi til heiðurs

félagsmál Þriggja daga þing BSRB, Bandalags starfsmanna ríkis og bæja, verður sett á Grand hóteli á morgun.

Yfirskrift þingsins er: Framtíð byggð á jöfnuði, atvinnu, velferð og réttlæti en verkefni þess er að móta stefnu bandalagsins til næstu þriggja ára. Þingfulltrúar eru um 260.

Þá liggur fyrir þinginu að kjósa nýjan formann en Ögmundur Jónasson lætur af því starfi eftir rúmlega tuttugu ára formennsku.

Ögmundur ávarpar þingið við setningu þess í fyrramálið og síðdegis á morgun verður sérstök hátíðardagskrá í Háskólabíói honum til heiðurs.

Meðal þeirra sem fram koma eru Pétur Gunnarsson rithöfundur, Ellen Kristjánsdóttir og Eyþór Gunnarsson, BSRB kórinn og Lúðrasveit verkalýðsins.

Þau sem sækjast eftir formennsku hafa öll gegnt trúnaðarstörfum innan verkalýðshreyfingarinnar um nokkurn tíma og sitja í stjórn BSRB

Arna Jakobína Björnsdóttir er formaður Kjalar, en starfssvæði félagsins er í Borgarbyggð, Húnavatnssýslum og við Eyjafjörð.

Árni Stefán Jónsson er formaður SFR sem áður hét Starfsmannafélag ríkisstofnana. Hann hefur gegnt formennsku í BSRB síðan Ögmundur fór í leyfi er hann varð ráðherra í febrúar.

Elín Björg Jónsdóttir er formaður Félags opinberra starfsmanna á Suðurlandi.

- bþs