Hvetur ríkið til að breyta um fjárfestingarstefnu í atvinnulífinu

Breyti ríkisstjórnin ekki um stefnu varðandi fjárfestingar í atvinnulífinu er áþreifanlegur möguleiki á því að ekki verði hægt að framlengja kjarasamninga og ófriður verði á vinnumarkaði, segir framkvæmdastjóri Samtaka atvinnulífsins. Menn eru í kapphlaupi við tímann.

Talið er að lausn Icesave málsins muni auka líkurnar á því að gjaldeyrishöftum verði aflétt og vextir lækkaðir. Þetta segir Vilhjálmur Egilsson, framkvæmdastjóri Samtaka atvinnulífsins, að skipti höfuðmáli fyrir framgang atvinnulífsins á næsta ári. Hins vegar vanti á að ríkisstjórnin taki ákvarðanir um að koma stórum, orkufrekum fjárfestingum og framkvæmdum í atvinnulífinu af stað. Vilhjálmur telur liggja á einhverju útspili ríkisstjórnarinnar, því allt þetta spili saman þegar forsendur kjarasamninga sé metnar.

„Þetta er allt saman verkefni sem við þurfum að leysa á mjög stuttum tíma. Það þarf að verða stefnubreyting hjá ríkisstjórninni varðandi fjárfestingar í atvinnulífinu og við skulum bara sjá til," segir Vilhjálmur og bætir við að raunhæfur möguleiki sé á því að ekki verði hægt að framlengja kjarasamninga og að þá verði ekki friður á vinnumarkaðnum.

Viðræður aðila vinnumarkaðarins standa nú yfir, en þeir eru í kapphlaupi við tímann við reyna að ná saman í kjaramálum. Einungis vika er þar til kjarasamningar eru lausir og þarf niðurstaða að liggja fyrir, fyrir 27. október. Aðspurður segir Vilhjálmur að unnið sé á þeim forsendum að það takist, en alls óvíst sé um niðurstöðuna á þessari stundu.