Fordæmir skemmdarverk í nafni mótmæla

Ríkisstjórn Íslands fordæmir aðfarir og skemmdarverk sem beinast gegn heimilum fólks. Þetta kemur fram í minnisblaði sem samþykkt var á ríkisstjórnarfundi í morgun. Þar segir að ríkisstjórnin fordæmi skilyrðislaust og með skýrum hætti það ofbeldi sem fellst í því að ráðist sé gegn friðhelgi og einkalífi fólks.

Stjórnin hvetur til samstöðu á meðal fólks um að stöðva framangreinda óheillaþróun. Þá er undirstrikað að ríkisstjórnin viðurkenni réttinn til mótmæla en um leið er fólk hvatt til þess að hafa slík mótmæli á friðsamlegum nótum og innan marka laganna.

Á stuttum blaðamannafundi eftir ríkisstjórnarfundinn vísaði Jóhanna Sigurðardóttir, forsætisráðherra sérstaklega til þess þegar lakkleysi var skvett á bíl Rannveigar Rist forstjóra Rio Tinto - Alcan á Íslandi, en Rannveig meiddist í andliti þegar efnið skvettist á hana.