Rektor: HÍ nái öllum markmiðum sínum

„Horfur eru á að skólinn muni ná öllum þeim markmiðum sem sett voru og felld inn í afkastatengdan samning við ríkisvaldið," sagði Kristín Ingólfsdóttir, rektor Háskóla Íslands, við brautskráningu skólans í dag.

Vísar hún þar til markmiðasetningar háskólans fyrir árin 2006 til 2011, en þar er meðal annars stefnt að fimmföldun doktorsnema við skólann á tímabilinu. Kristín lagði áherslu á áhrif doktorsverkefna við HÍ á atvinnuuppbyggingu og nýsköpun á höfuðborgarsvæðinu og landsbyggðinni.

Kristín sagði Íslendinga eiga verk að vinna í kjölfar efnahagserfiðleika undanfarinna mánaða.

„Við sem eigum mest undir fjárveitingu frá ríkinu verðum að tryggja að eins vel sé farið með fjármuni og kostur er," sagði Kristín einnig, en benti jafnframt i á að hlúa þyrfti að því sem best er gert og skapar okkur sérstöðu og áþreifanlegan árangur.

„Ef við náum þannig að styrkja menntakerfið, og nýta það sem lið í að varða leiðina úr þrengingunum, komum við vel undirbúin til leiks þegar þessu samdráttarskeiði lýkur. Til þess verðum við að hugsa stórt, hafa heildarhagsmuni í huga og þor til að taka erfiðar ákvarðanir. Ef menntakerfið fellur hinsvegar í far meðalmennsku verðum við lengi að ná okkur á strik aftur," sagði Kristín.