Þúsundir krefjast breytinga

Mikill mannfjöldi kom saman á Austurvelli fyrr í dag þegar sextándi mótmælafundur Radda fólksins hófst. Talið er að mótmælin hafi verið þau fjölmennustu frá því að þau hófust í október. Formlegum fundi er lokið en þúsundir standa enn á Austurvelli, framkalla hávaða, krefjast breytinga og segja ríkisstjórnina vanhæfa.

Í ávarpi sínum á fundinum gagnrýndi Magnús Björn Ólafsson, blaðamaður, þá sem grýtt hafa lögreglumenn og reynt að kveikja í þinghúsinu. Hann sagðist ekki vilja að blautustu draumar Björns Bjarnasonar, dómsmálaráðherra, verði að veruleika. Magnús sagði tíma flokkakerfisins vera liðinn og það sem eigi við um tíma valdaklíkunnar.

Hildur Helga Sigurðardóttir, blaðamaður, krafðist í ræðu sinni að alþjóðleg rannsóknarnefnd verði fenginn til að fara yfir aðdraganda bankahrunsins. Jafnframt spurði hún hvort að þingmenn þyrftu ekki á endurmenntun að halda.

Jakobína Ingunn Ólafsdóttir, stjórnsýslufræðingur, sagði almenning hættan að taka mark á ráðamönnum og nauðsynlegt væri að taka af þeim völdin því þeir hafi brugðist.

Nafn Íslands er tengt við hálfvitahátt og viðvaningslega glæpi, að mati Guðmundar Andra Thorsson, rithöfundar semlauk ræðu sinn á orðunum; ,,Við erum þjóðin. Við erum vonin."

Um leið og Hörður Torfason, einn af forsvarsmönnum Radda fólksins, sleit fundinum boðaði hann til nýs fundar að viku liðinni á sama tíma og á sama stað.