Nýjar leiðbeiningar um fjarvistir vegna veikinda af völdum svínaflensu

Með hliðsjón af nýjum upplýsingum er einstaklingum sem taldir eru vera með sýkingu af völdum H1N1 inflúensu, eða svínaflensu, ráðlagt að halda sig heima í tvo daga eftir að þeir verða hitalausir, að fram kemur á vef Landlæknisembættisins. Þar segir ráðleggingarnar séu gefnar til að reyna að draga úr líkum á smiti í samfélaginu.

Greint var frá því í dag að stjórnvöld hafa keypt 300 þúsund skammta af bóluefni gegn svínaflensu og stefnt er á að hefja bólusetningar eftir mánuð. Ákveðið hefur verið að barnshafandi konur, sjúklingar, heilbrigðisstarfsmenn, lögreglumenn, slökkviliðsmenn og björgunarsveitarmenn njóti forgangs þegar kemur að bólusetningu. Alls eru þetta um 70 þúsund manns.

Gert er ráð fyrir að bóluefnið berist til landsins um næstu mánaðamót og að í byrjun október verði byrjað að bólusetja landsmenn gegn veikinni. Bólusett verður á heilsugæslustöðvum, á sjúkrahúsinu á Akureyri og á Landspítalanum.

Þegar lokið verður við að bólusetja þennan forgangs hóp verður öllum á aldrinum sex mánaða til 18 ára boðið upp á bólusetningu en það verður líklega í nóvember. Öðrum landsmönnum verður síðan boðin bólusetning þegar á líður en það verður þó líklega ekki fyrr en í kringum áramótin.