Metfjöldi erlendra ferðamanna

Um 92 þúsund erlendir gestir fóru frá landinu um Leifsstöð í nýliðnum ágústmánuði, átta þúsund fleiri en í sama mánuði á síðasta ári sem þá var met. Erlendum gestum fjölgar því um 9,6% milli ára. Brottförum Íslendinga fækkaði hins vegar um tæp 40%, voru um 24 þúsund í ágúst í ár en um 39 þúsund á árinu 2008, samkvæmt upplýsingum frá Ferðamálastofu.

Ef litið er til helstu markaðssvæða má sjá fjölgun frá Mið- og Suður Evrópu, Norðurlöndunum og N-Ameríku. Af einstökum löndum fjölgaði Kínverjum, Finnum, Spánverjum, Ítölum og Þjóðverjum hlutfallslega mest. Pólverjum fækkaði hins vegar umtalsvert eða um 36%, Bretum um 17% og gestum frá fjarmörkuðum um 10%.

Samkvæmt upplýsingum frá Ferðamálastofu hafa 350 þúsund erlendir gestir frá landinu frá áramótum, eða um eitt prósent fleiri en á sama tímabili árinu áður. Brottförum Íslendinga frá áramótum fækkaði milli ára um tæp 45 prósent eða 139 þúsund. Talningin er unnin á vegum Ferðamálastofu og nær yfir allar brottfarir um Leifsstöð, þar með talið brottfarir erlends vinnuafls.