Kjötsúpa og þungarokk í Vítisenglaveislu

Margt verður á boðstólnum í innflutningsgleði Fáfnis sem verður haldin annað kvöld, en mikill viðbúnað er vegna komu Vítisengla víðsvegar úr heiminum á Leifsstöð í dag. Dómsmálaráðuneytið hefur sagt fyrirhugaðan fagnað Fáfnis ógna allsherjareglu og þjóðaröryggi. Enn hefur enginn Vítisengill komið inn í landið en félagar þeirra, með Jóni Trausta Lútherssyni fremstan í flokki, bíða eftir þeim upp á Leifstöð.

Samkvæmt heimildum verður mörgu tjaldað til á morgun en Vítisengla-veislan verður haldin í iðnaðarhverfi í Hafnarfirði nærri Straumsvík. Meðal þess sem verður á boðstólnum er alíslensk kjötsúpa sem Fáfnis-maðurinn Sverrir Þór Einarsson, betur þekktur sem Sverrir Tattú, hyggst elda. Þá munu verða haldnir tónleikar en það er þungarokkahljómsveitin Dark Harvest, með gítarleikaranum Gulla Falk í farabroddi, sem mun spila fyrir dansi.

Þetta er þó ekki í fyrsta sinn sem hljómsveitin spilar fyrir Vítisengla því þeir spiluðu fyrir þá í Noregi fyrir um ári síðan. Svo virðist sem Vítisenglarnir hafi tekið ástfóstri við hljómsveitina sem mun spila í annað sinn fyrir englana á morgun.

Viðbúnað lögreglunnar er gríðarlegur, meðal annars hefur landamæraeftirlit verið hert til muna. Þá má búast við mikilli löggæslu í kringum fagnað Fáfnismanna á morgun. Að auki hefur Bæjarstjórn Hafnarfjarðar gefið út yfirlýsingu varðandi félagsheimili vélhjólamannanna. Þá sagði Lúðvík Geirsson í fréttum Stöðvar 2 í gær að bæjaryfirvöld myndu sjá til þess að Fáfnismenn héldu sig innan ramma laganna.

Viðbúið er að veislan hefjist síðdegis á morgun með pompi og prakt.