Vinstri græn óstjórntæk - vill Hrunflokkastjórn

Jón Gunnarsson, þingmaður Sjálfstæðisflokksins, segir að þegar komi að uppbyggingu atvinnulífsins séu Vinstri grænir óstjórntækur flokkur. Hann telur að á næstunni geti skapast aðstæður þar sem lögð verði fram vantrausttillaga á ríkisstjórnina. Jón vill að mynduð verði til eins árs þriggja flokka stjórn Sjálfstæðisflokks, Framsóknarflokks og Samfylkingar.

Jón segir að ákvarðanir ríkisstjórnarinnar í sjávarútvegsmálum og varðandi álversframkvæmdir á Bakka og í Helguvík sýna að stjórnin sé óhæf til að koma atvinnulífinu af stað. „Það er komið að þolmörkum," segir Jón og bætir við að auk þess sé ríkisstjórnin ósamstíga í aðgerðum sínum.

„Það eru fyrst og fremst aðgerðir umhverfisráðherra og viðhorf Vinstri grænna sem eru ekki líkleg til að koma verkefnum í gang sem við teljum bráðnauðsynleg þegar kemur endurreisn atvinnulífsins," segir þingmaðurinn.

Ekki rætt innan þingflokksins

Af þeirri ástæðu telur Jón nauðsynlegt að nýir aðilar komi að stjórnarborðinu. Mynduð verði til eins árs um ákveðin mál ríkisstjórn

Sjálfstæðisflokks, Framsóknarflokks og Samfylkingar undir forystu sjálfstæðismanna. Jón segir að málið ekki hafa hlotið formlega umræðu innan þingflokksins. Þetta sé sín skoðun.

Biðjist ríkisstjórn Samfylkingar og Vinstri grænna ekki lausnar á næstunni útilokar Jón ekki að lögð verði fram á Alþingi vantrausttillaga á stjórnina. „Það getur komið af þeim tímapunkti," segir Jón en tekur fram að málið hafi ekki verið rætt sérstaklega í þingflokki sjálfstæðismanna.

Hrunflokkastjórn



Jón Kaldal, ritstjóri Fréttablaðsins, segir í leiðara í dag að einungis þrír flokkar séu starfhæfir á Alþingi. Framsókn, Samfylking og Sjálfstæðisflokkur. Ríkisstjórn þessara flokka gæti verið lausn á ákveðnum vanda.

„Hrunflokkastjórnin gæti hún kallast og verkefni hennar væri auðvitað tiltekt eftir þá flokka sem hana mynda, auk hraðrar stefnumörkunar í stóriðjumálum og uppbyggingar atvinnulífsins. VG væri þá komin í stjórnarandstöðu og allt aftur eins og það á að sér að vera,“ segir Jón í leiðaranum.