Daníel vann jólalagakeppni Rásar 2 í annað sinn

Laga- og textahöfundurinn Daníel Geir Moritz vann jólalagakeppni Rásar 2 ásamt Jólabandinu með laginu Jólastress. Þetta er í annað sinn sem hann ber sigur úr býtum í keppninni.

„Jólalög eru oft um ástina og gleðina í kringum jólin, en í þessu lagi koma fyrir setningar og atriði sem flestallir geta tengt við í tengslum við jólastressið,“ segir Daníel Geir Moritz, sigurvegari Jólalagakeppni Rásar 2.

Daníel samdi bæði lag og texta við sigurlagið Jólastress sem er í flutningi Jólabandsins, en í öðru sæti varð lagið Heilög jól eftir Valgeir Skagfjörð, sungið af Guðrúnu Árnýju Karlsdóttur, og í því þriðja sæti var lag Hafsteins Þráinssonar, Jólin í okkar nafni. Þetta er ekki í fyrsta sinn sem Daníel Geir og Jólabandið sigra í umræddri keppni því hann bar einnig sigur úr býtum árið 2007 með laginu Gjöfin mín ert þú.

„Ég gaf út lag í fyrsta sinn fyrir Neistaflug í Neskaupstað 2007. Í kjölfarið tókum við Jólabandið þátt í þessari keppni og þegar það gekk svona ljómandi vel ákváðum við að semja jólalag á hverju ári,“ segir Daníel, sem sendi þó ekki inn lag í keppnina í fyrra. „Við gerðum jólalag í fyrra sem fór um netheimana og til vina og vandamanna, en núna fannst okkur þetta efnilegt lag og fannst besti farvegurinn að setja það í þessa keppni,“ útskýrir hann.

Daníel Geir, sem er 24 ára, starfar í Bóksölu Kennaraháskólans og nemur skapandi skrif í Háskóla Íslands. Auk þess fæst hann við umboðsmennsku og uppistand. Aðspurður segist hann hafa byrjað í tónlistinni fjórtán ára gamall.

„Ég byrjaði að læra á gítar í Tónskólanum í Neskaupstað, en hætti þegar ég átti að fara að læra nótur. Annars hef ég yfirleitt verið þessi partíglamrari þangað til sumarið 2006 þegar Sturla Már Helgason hljómborðsleikari fór að hvetja mig til að taka upp eigin tónlist,“ útskýrir Daníel, en segist hvorki syngja né spila sjálfur í endanlegum útgáfum af lögum sínum.

„Ég sem bara lag og texta, smala í stúdíó og svo er bara partí. Ég útset lögin með Jólabandinu og þá verður alveg stórbrotin breyting á demóunum mínum. Það er breytilegt hverjir eru með í Jólabandinu hverju sinni, en Eiríkur Hafdal er söngvari bandsins,“ útskýrir hann.

„Það getur hver sem er fengið góða hugmynd, en það eru ekki allir jafn heppnir og ég að eiga félaga sem eru tilbúnir að hjálpa mér að búa til tónlist,“ bætir hann við og brosir.

Spurður um lagasmíðarnar segist hann eiga nóg efni. „Ég á alveg stílabækurnar af lögum, en hef ekki verið mjög duglegur að koma þeim frá mér. Það er mjög hentugt þegar tilefni eru eins og Neistaflug og svo koma alltaf jól,“ segir hann og útilokar ekki þátttöku í forkeppni Eurovision.

„Ég er búinn að lofa sjálfum mér því að taka einhvern tíma þátt í Söngkeppni sjónvarpsins, svo er stefnan að fara að semja fyrir listamenn á þeirra forsendum,“ segir Daníel. Í verðlaun hlaut hann rúm frá Rekkjunni og 100.000 króna gjafabréf frá Krónunni. „Ég er frá Neskaupstað, en er búinn að búa í bænum í fjögur ár. Ég hef bara verið með rúm í láni síðan, svo það er fínt að geta farið og keypt almennilegt rúm,“ segir hann brosandi og bendir á heimasíðu sína umboðsstofan.is/jolabandid, þar sem fólk getur nálgast jólatónlist hans endurgjaldslaust.alma@frettabladid.is