Liverpool tapaði fyrir botnliðinu

Portsmouth vann í dag 2-0 sigur á Liverpool í fyrsta leik dagsins í ensku úrvalsdeildinni.

Þetta var sjöunda tap Liverpool í deildinni í vetur og möguleiki á því að liðið verði fallið niður í áttunda sæti deildarinnar þegar leikjum helgarinnar verður lokið.

Portsmouth náði þrátt fyrir sigurinn ekki að koma sér upp úr botnsæti deildarinnar en liðið er nú með fjórtán stig, rétt eins og West Ham, og aðeins tveimur stigum frá öruggu sæti.

Hermann Hreiðarsson lék allan leikinn með Portsmouth og stóð sig vel, rétt eins liðsfélagar hans.

Liverpool byrjaði betur og komst Fernando Torres í ágætt færi snemma í leiknum en skaut yfir. En heimamenn unnu sig betur inn í leikinn eftir því sem leið á fyrri hálfleikinn og komust svo yfir á 33. mínútu.

Kevin-Prince Boateng átti skot að marki sem Pepe Reina varði. Glen Johnson, fyrrum leikmaður Portsmouth, reyndi að koma boltanum frá markinu en skallaði hann beint fyrir fætur Nadir Belhadj sem þrumaði knettinum í netið úr þröngu færi.

Daniel Agger fékk svo færi til að jafna metin fyrir Liverpool en hann skallaði boltann naumlega yfir eftir fyrirgjöf Steven Gerrard úr aukaspyrnu.

Liverpool varð svo fyrir áfalli undir lok fyrri hálfleiksins er Javier Mascherano fékk að líta rauða spjaldið eftir að hafa tæklað Tal Ben Haim nokkuð harkalega. Mascherano fær fjögurra leikja bann fyrir spjaldið þar sem þetta var annað rauða spjaldið sem hann fær í vetur.

Bæði lið fengu nokkur hálffæri í síðari hálfleik en Portsmouth gerði út um leikinn á 82. mínútu þegar að Frederic Piquionne kom heimamönnum 2-0 yfir.

Boateng kom boltanum inn í teig þar sem Piquionne var mættur. Hann tók boltann með einni snertingu og skoraði svo með föstu skoti, aftur úr mjög þröngu færi.

Þar með var ljóst að sigur Portsmouth var tryggður og aukast því vandræði Rafa Benitez og hans manna í Liverpool enn.