Víðtæk leit á Breiðafirði í nótt

Víðtæk leit var gerð á Breiðafirði í nótt, eftir að að þar sáust tvö neyðarblys á lofti laust fyrir klukkan ellefu í gærkvöldi. Björgunarbátur frá Búðardal og tveir fiskibátar frá Stykkishólmi, með björgunarsveitarmenn og lögreglu um borð, leituðu vítt og breitt um fjörðinn í góðu veðri og góðu skyggni og þyrla Landhelgisgæslunnar leitaði úr lofti fram yfir klukkan þrjú í nótt, en allt án árangurs.

Þá var víðtæk eftirgrennslan gerð í landi en einskis báts virðist vera saknað. Blysin sáust frá Kambsnesi, sunnan við Búðardal, og var því einkum leitað úti fyrir Hvammsfirði. Ákveðið verður með birtingu hvort ástæða þykir til frekari leitar.