Þórður tjáir sig ekki um brottreksturinn

Þórður Þorgeirsson knapi sem rekinn var úr landsliði íslenskra hestamanna vegna agabrota segir að gróflega hafi verið brotið á sér og hann leiti nú réttar síns vegna málsins.

Greint var frá brottrekstrinum á hestafrettir.is í gær en Þórður var valinn í landsliðið sem kynbótaknapi og átti að sýna stóðhestinn Kjarna frá Auðsholtshjáleigu á yfirlitssýningu í gær.

Síðastliðið sunnudagskvöld var haldið svokallað Landakvöld á mótssvæðinu í Brunnadern. Myndbandi frá því kvöldi hefur verið lekið á vefsíðuna Youtube en á því sjást landsliðsmennirnir stíga sporið við hin ýmsu lög en Þórður hefur sig þó hvað mest í frammi.

Þórður segist í samtali við fréttastofu ekki vilja tjá sig um málið en hann segir gróflega hafa verið brotið á sér. Hann hyggist ræða við sína lögfræðinga og gefa svo frá sér yfirlýsingu í vikunni.

Á vefsíðunni Hestafréttir.is er rætt við Einar Öder Magnússon landsliðseinvaldur sem segist hafa varað Þórð við, en það ekki dugað. Hann segir agabrot af þessu tagi

ófyrirgefanleg og hestamennskunni til vansa. Aganefnd ÍSÍ muni taka nánar á málinu.

Þrátt fyrir þetta atvik fékk íslenska landsliðið liðsverðlaun sem veitt eru fyrir góðan árangur á mótinu. Þá varð Jóhann Skúlason sem keppti fyrir Íslands hönd á hestinum Hvini frá Holtsmúla heimsmeistari í tölti og fer því heim með hið eftirsótta tölthorn.