Jóhanna talin áhrifamikil

Bretland Jóhanna Sigurðardóttir forsætisráðherra er í 48. sæti á lista tímaritsins New Statesman yfir fimmtíu áhrifamestu einstaklinga veraldar þessa dagana.

Í fyrsta sæti listans er Obama-fjölskyldan í Bandaríkjunum, en í öðru sæti er Murdoch-fjölskyldan, það er fjölskylda fjölmiðlajöfursins Ruperts Murdoch sem á nokkra helstu fjölmiðla veraldar. Í þriðja sæti er svo Marwan Barghouti, Palestínumaður sem hefur verið fangi Ísraelsmanna síðan 2004 en er talinn hugsanlegur framtíðarleiðtogi Palestínumanna.

Jóhanna er í tímaritinu nefnd Ísdrottningin, en henni er talið til tekna að vera fyrsti kvenkyns forsætisráðherra Íslands ásamt því að vera fyrsti samkynhneigði þjóðarleiðtogi heims, sem ekki fer í felur með það.

Starfsbróðir Jóhönnu í Bretlandi, Gordon Brown, er í 29. sæti listans. Hann er sagður hafa verið fremstur í röð vestrænna leiðtoga í baráttu þeirra gegn heimskreppunni.

Einungis fáir þjóðarleiðtogar eru á þessum lista, sem birtur var í lok september. Vladimír Pútín, forsætisráðherra Rússlands, er í sjöunda sæti en næstur honum kemur Osama bin Laden í áttunda.

Næst á undan Jóhönnu, í 47. sæti, eru poppgoðin Jay-Z og Beyoncé, en í neðsta sæti listans er samsærishöfundurinn Dan Brown. - gb