Stjórnlagaþingið verði 2011

Til álita kemur að fresta fyrirhuguðu stjórnlagaþingi til ársins 2011. Fram til þessa hefur ríkisstjórnin stefnt að því að halda slíkt þing á næsta ári.

Stjórnlagaþingi er ætlað að vera ráðgefandi við endurskoðun stjórnarskrárinnar.

Stjórnlagaþing hefur verið eitt af höfuðmálum ríkisstjórnarinnar frá því að hún tók við völdum 1. febrúar. Fjallað var um það í verkefnaskrá minnihlutastjórnarinnar og aftur í samstarfsyfirlýsingunni eftir kosningarnar í apríl. Í henni segir að kjósa eigi til þingsins í síðasta lagi samhliða sveitarstjórnarkosningunum 2010. Mælti Jóhanna Sigurðardóttir forsætisráðherra fyrir frumvarpi þar um í júlí en það fékkst ekki rætt. Í þingmálaskrá vetrarins segir að frumvarp um stjórnlagaþing verði lagt fram en ekki er getið um hvenær það verði haldið.

Ekki er vikið orði að stjórnlagaþingi í fjárlagafrumvarpi næsta árs. Í frumvarpi sumarsins kom fram að kostnaður vegna þinghaldsins gæti numið á bilinu 362-442 milljónir króna. Var áætlað að það stæði í 8-11 mánuði.

Samkvæmt upplýsingum úr forsætisráðuneytinu er nú til skoðunar hvort unnt sé að stytta starfstíma þess, auk þess að fresta því til ársins 2011. - bþs