Engir dreifimiðar vegna barnaníðinga

Tillaga Danska þjóðarflokksins um að vara fólk við með dreifimiðum ef dæmdur barnaníðingur flyst í hverfi þess hefur verið skotin í kaf.

Danski íhaldsflokkurinn hefur tilkynnt að hann taki afstöðu með Venstre og jafnaðarmönnum sem hafa hafnað tillögunni.

Talsmaður íhaldsflokksins Tom Behnke hafði þetta að segja;

-Hinn opinberi gapastokkur var lagður af undir lok miðalda og því segjum við nei. Þegar fólk hefur tekið út sína refsingu þá hefur það tekið út sína refsingu. Og þá á ekki að leggja það í einelti.

Tom Behnke sagðist heldur ekki geta séð hvernig þessu yrði komið í framkvæmd;

-Hver á að fylgjast með því hvort og hvert fólk flytur? Á hvað stóru svæði á að dreifa bréfunum? Og hver er tilgangurinn?Þetta er fjandinn hafi það ómögulegt.

Danski þjóðarflokkurinn fær heldur ekki stuðning við tillögu sína utan þingsins. Lagaprófessorar, barnaverndarsamtök og margir fleiri aðilar hafa lagst gegn henni.