Ísraelar afboða Íslandsheimsókn

Ekkert verður af boðaðri komu ísraelska menntamálaráðherrans hingað til lands. Össur Skarphéðinsson hafði sem starfandi utanríkisráðherra frábeðið sér heimsókn ráðherrana og nú hafa ísraelsk stjórnvöld ritað utanríkisráðherra og tjáð honum að ekkert verði af heimsókninni.

Þetta kemur fram á bloggsíðu Össurar. „Ráðherrann var einn af sex ráðherrum ísraelsku stjórnarinnar, sem hún gerði út af örkinni til að hafa áhrif á skoðanir ríkisstjórnar sem að mati hennar höfðu "brengluð viðhorf" til loftárása þeirra á almenning á Gasa svæðinu," segir Össur og bætir við að nú hafi borist svar frá Ísraelum.

„Væntanlega hafa stjórnvöld þar í landi séð, að heimsóknin yrði ekki til að breyta "brengluðum viðhorfum" (distorted views) okkar sem förum með þessi mál," skrifar ráðherran auk þess sem hann ítrekar kröfur um að árásir Ísraela á húsnæði Sameinuðu þjóðanna og Rauða hálfmánans verði rannsakaðar sem stríðsglæpur.

„Ég styð jafnframt að til verði frjáls og fullvalda Palestína, og tel hvorki Íslendinga né aðra eiga að skipta sér af lýðræðislega kjörnum stjórnum á svæðum þeirra, hvort sem eru í höndum Fatah hreyfingarinnar eða Hamas," segir Össur að lokum.