Ánægður með undirtektir við hugmyndir um myntsamstarf

Steingrímur J. Sigfússon, fjármálaráðherra og formaður Vinstri grænna, er ánægður með þær undirtektir sem hugmyndir um myntstarf Noregs og Íslands hafa fengið.

Kristin Halvorsen, fjármálaráðherra Noregs og formaður systurflokks VG, er opin fyrir myntsamstarfi þjóðanna. Hún mun ræða við Steingrím um málið. Ein og kunnugt er af fréttum fréttastofu er formaður norska Miðflokksins og samgönguráðherra Noregs, Liv Signe Navarsete, einnig áhugasöm um að Ísland og Noregur komi sér upp myntsamstarfi.

„Ég lít á þetta sem einn af möguleikunum," sagði Steingrímur á fundi með blaðamönnum í hádeginu. Við sama tilefni sagði Jóhanna Sigurðardóttir, forsætisráðherra, að ekki hafi verið fjallað um þessa leið innan ríkisstjórnarinnar og að sjálfri hugnist best upptaka evru samhliða inngöngu í Evrópusambandið.

Halvorsen kemur til Íslands um næstu helgi til að taka þátt í 10 ára afmælisfagnaði VG. „Við munu örugglega ræða þetta eins og svo margt annað," sagði Steingrímur að lokum.