Kolbrún segist ráða - annað segir Jóhanna

Fyrsta ágreiningsefni stjórnarflokkanna birtist landsmönnum í gær þegar Össur Skarphéðinsson túlkaði setninguna "Engin ný áform um álver verða á dagskrá ríkisstjórnarinnar," svo að hún ætti hvorki við álver Helguvík né á Bakka við Húsavík enda væru það gömul áform. Kolbrún Halldórsdóttir telur þetta ákvæði hins vegar útiloka álver á Bakka.

Þegar Kolbrún var spurð fyrir ríkisstjórnarfund í morgun hvort þeirra myndi ráða ferðinni, hún eða Össur, var svarið: "Umhverfisráðherra". Hún ætlaði sér að berjast fyrir því að sín túlkun á þessari setningu í stjórnarsáttmálunum væri rétt.

Þegar ráðherrar deila er það forsætisráðherrans að skera úr og úrskurður Jóhönnu Sigurðardóttur var skýr þegar hún var spurð á blaðamannafundi í hádeginu: Túlkun utanríkisráðherra væri rétt.

Sem sagt: Össur hefur rétt fyrir sér.

Kolbrún ætlar samt að beita sér fyrir annarskonar atvinnuuppbyggingu í Þingeyjarsýslum. Ekki í formi orkufrekrar stóriðju, sem losaði miklu meira en Íslendingar hefðu heimildir til, sem raskaði samfélögum og skildi sáralítið eftir í samfélaginu af efnislegum verðmætum.