Meðalferðatími styst um þrjár til fjórar mínútur

Meðalferðatími á háannatíma í Reykjavík hefur styst um þrjár til fjórar mínútur fyrir hvern bíl á milli ára. Þetta er niðurstaða nýrra umferðartalninga umhverfis- og samgönguráðs borgarinnar, sem fram fóru í nóvember.

Þrátt fyrir þetta er algengur ferðatími milli úthverfa og miðborgar Reykjavíkur 28 til 38 mínútur fram og til baka. Það þýðir að Reykvíkingar eyða tveimur til þremur klukkustundum á viku í bílum sínum á leið milli bæjarhluta.

Ferðavenjukönnun sýnir einnig að færri ferðast nú einir í bílum sínum en áður. Í fyrra ferðuðust 76 prósent ein í bíl, miðað við 71 prósent nú. Hin 29 prósentin fara til vinnu ýmist sem farþegar í bíl, í strætó eða með öðrum hætti. Mest hefur þeim fjölgað sem ganga eða hjóla til vinnu. Í fyrra nýttu níu prósent þá kosti, en fjórtán prósent í ár. „Auðvitað hefur kreppan heilmikil áhrif,“ segir Gísli Marteinn Baldursson, formaður umhverfis- og samgönguráðs Reykjavíkur.

„Það eru færri á leiðinni til vinnu út af atvinnu- og efnahagsástandinu,“ bætir hann við.

Kreppan skýri hins vegar ekki nema að litlu leyti breyttar ferðavenjur. „Fjölbreytilegri ferðamátar gera það að verkum að þeir sem þurfa að fara á bílum til vinnu komast greiðar leiðar sinnar,“ segir Gísli. Það spari hverjum og einum sem áður segir þrjár til fjórar mínútur að meðaltali. „Í heildina eru það mörg þúsund vinnustundir á hverjum einasta degi,“ segir hann.

„Við erum ófeimin við að þakka þetta átakinu Grænu skrefunum sem ganga einmitt út á fjölbreytilegri ferðamáta þannig að allir komist leiðar sinnar örugglega og hratt á þann hátt sem þeir vilja, hvort sem það er bíll, strætó, reiðhjól eða gangandi.“- sh