Telur líklegt að loka þurfi grunnskólum

„Þróun sem ég sé fyrir mér að gæti komið til er lokun fámennari skóla. Það gæti orðið neyðarbrauð einhverra sveitar­félaga að grípa til slíkra aðgerða," segir Halldór Halldórsson, formaður Sambands íslenskra sveitarfélaga.

Sambandið hefur kynnt fyrir menntamálaráðherra tillögur sem gera myndu sveitar­félögunum kleift að svara hagræðingarkröfu innan grunnskólanna á næstu tveimur skólaárum. Krafan er 3,5 milljarðar á ári. Hver leið myndi spara um 1,5 milljarða.

Leiðin sem helst er talin líkleg felur í sér að stytta vikulegan kennslutíma um þrjár til fimm kennslustundir á viku. Slík leið krefst þess ekki að hróflað verði við kjarasamningum kennara. Önnur leið sem nefnd hefur verið, og er hluti af tillögum sambandsins, er stytting skólaársins úr 180 dögum í 170 dögum á ári.

Samkvæmt heimildum Fréttablaðsins hefur sú leið verið blásin út af borðinu vegna andstöðu kennara.

Halldór segir tillögurnar lokatilraun til þess að koma á samræmdum aðgerðum til að ná hagræðingu innan grunnskólans. Verði tillögunum hafnað þýði það að hvert sveitarfélag stendur eitt í baráttu sinni við þann fjárhagsvanda sem við er að glíma í þessu tilliti.

Eiríkur Jónsson, formaður Kennarasambandsins, er gagn­orður þegar spurt er um hug hans til tillagna sveitarfélaganna. „Ég trúi því ekki að menntamálaráðherra láti sér detta það í hug að verða við þessu. Þetta er arfavitlaust."

Hann segir að þessi leið hafi verið farin áður og það hafi verið upphafið að löngu tímabili verkfalla og óvissu.

Árið 2008 var kostnaður sveitar­félaganna vegna grunnskólanna 52 milljarðar eða fjörutíu til sextíu prósent af útgjöldum þeirra. Undanfarið hafa staðið yfir viðræður á milli sveitarfélaganna og mennta- og menningarmálaráðuneytið í þessu ljósi. Tilefnið er sá vandi sem mörgum sveitarfélögum er á höndum vegna alvarlegs tekjusamdráttar, en á yfirstandandi ári stefnir hann í að verða tíu milljarðar króna.- shá /