Björgunarsveitir aðstoða tvo Frakka

Björgunarsveitir Slysavarnafélagins Landsbjargar eru nú á leið til aðstoðar tveimur Frökkum sem eru í vandræðum á Sprengisandi. Ferðalangarnir voru á leið í Nýjadal en veður er mjög vont á svæðinu og hafa þeir misst frá sér tjaldið en eru annars vel búnir. Frakkarnir komu boðum um að þeir þyrftu hjálp í gegnum síma til félaga síns í heimalandinu sem hafði samband við Slysavarnafélagið Landsbjörgu.

Samkvæmt upplýsingum frá Landsbjörgu fór snjóbíll frá Hjálparsveitinni Dalbjörgu frá Berglandi fyrir um klukkustund og annar er lagður af stað frá Súlum- björgunarsveitinni á Akureyri. Auk þess hafa vélsleðar verið sendir af stað. Meðlimir úr Dalbjörgu eru í um 50 kílómetra fjarlægð frá Frökkunum en þeir voru í æfingaferð á svæðinu. Ferð þeirra sækist hægt þar sem aðstæður eru erfiðar. Frakkarnir halda nú kyrru fyrir um það bil 10 kílómetrum vestur af Fjórðungsöldu á Sprengisandi en ekki hefur enn náðst samband við þá.