Segir kæru FME aðför gegn skynsemi

Fyrsta sakamálið sem sérstakur saksóknari, Ólafur Hauksson, tók til rannsóknar, var meint brot blaðamannsins Kristins Hrafnssonar á bankaleynd. Kristinn birti upplýsingar um lánveitingar Kaupþings til Róberts Tchenguiz og forsvarsmenn Fjármálaeftirlitsins (FME) telja að með því hafi hann rofið bankaleynd.

Kristinn er afar ósáttur við málsmeðferðina og segist hafa orðið fyrir miklum skaða af málinu. „Ég mun nýta öll úrræði til að leita réttar míns, því ég lít svo á að verið sé að brjóta á mér með mjög alvarlegum hætti.“ Kristinn segir fráleitt að lög um bankaleynd nái yfir hann, enda vinni hann ekki hjá fjármálastofnun.

Gunnar Þ. Andersen, forstjóri FME, segir stofnunina eingöngu vera að fara eftir lögum. Samkvæmt þeim fylgi trúnaður upplýsingunum og því gildi bankaleyndin einnig um blaðamennina. „Hér togast á almannahagsmunir og svo sjálf lögin um þagnarskyldu. Við sendum málið áfram að ráði lögfræðinga til ríkissaksóknara. Lögin eru eins og þau eru og við getum ekki valið hvað við kærum og hvað við kærum ekki. Þetta er hins vegar allt mjög erfitt og viðkvæmt og ég hef skilning á því, en þetta eru brot á lögunum.“

Kristinn segir að FME hafi dregið málið úr hófi og það sé allt hið vandræðalegasta. Fyrst hafi það verið sent til sérstaks saksóknara sem hafi vísað því frá sér. FME hafi haft mánuð til að andmæla því en ekki nýtt sér þann rétt. Fimm mánuðum síðar hafi stofnunin síðan sent málið til ríkissaksóknara, sem hafi sent það áfram til sérstaks ríkissaksóknara. Þess ber að geta að ríkissaksóknari, Valtýr Sigurðsson, fjallar ekki um mál tengd kreppunni.

„Ég undrast það að stofnunin skuli fara krókaleiðir og kaupa vinnu hæstaréttarlögmanna út í bæ til að finna leiðir til að klekkja á mér,“ segir Kristinn. Hann segir stofnunina vera að fá línurnar lagðar og hann sem einstaklingur lendi inn á milli. „Hvers lags viðhorf gagnvart einstaklingum er þetta? Þetta er bara rakin móðgun!“

Gunnar segir vissulega um prófmál að ræða, í þeim skilningi að með því fáist fordæmi um hvernig mál af þessum toga verði meðhöndluð í framtíðinni. Dómstólar verði að meta það, ef það fer alla leið.kolbeinn@frettabladid.is