Ungir danskir hermenn í Afganistan

Danir hafa af því nokkrar áhyggjur að hermenn sem þeir senda á vígvelli eins og Afganistan verða sífellt yngri. Nýlega voru sendir þangað nítján hermenn sem allir eru nítján ára að aldri.

Árið 2002 var meðalaldur danskra heremanna sem sendir voru í stríð 31,27 ár. Í dag er meðalaldurinn 27,8 ár. Samkvæmt dönskum lögum má ekki senda yngri hermenn en átján ára á vígvöllinn.

Sálfræðiprófessor segir vissa hættu felast í því að senda mjög unga hermenn í bardaga.

Ef þeir verði vitni að einhverjum hræðilegum atburði geti verið mun erfiðara fyrir þá að vinna úr því en fyrir mann sem er til dæmis orðinn tuttugu og fimm ára.

Danir hafa sent hermenn til friðargæslu um allan heim á undanförnum áratugum. Þeir þykja harðskeyttir og góðir hermenn.