Börnin hundsa Gibson

Eins og komið hefur fram í fjölmiðlum stendur Mel Gibson nú í skilnaði við eiginkonu sína Robyn Gibson en hann er talinn geta orðið sá dýrasti í sögu Hollywood. Enda voru Mel og Robyn gift í 28 ár og eignuðust sjö börn. Og nú greina bandarískir fjölmiðlar frá því að börn leikarans vilji lítið af pabba sínum vita og séu víst alveg brjáluð útí hann. Fjölmiðlar hafa nefnilega greint frá því hann hafi átt vingott tvær rússneskar Oksönur og því leikið tveimur skjöldum.

Nágranni Mel Gibson í Malibu sagði við fjölmiðla að börnin væru í miklu uppnámi vegna skilnaðar foreldra sinna. „Ekkert þeirra vill tala við Mel, þau eru brjáluð," sagði nágranninn. Náinn vinur fjölskyldunnar bætti því við að þetta væri ekki í fyrsta skipti sem Mel næðist með buxurnar á hælunum en nú gæti Robyn ekki litið í hina áttina. „Gibson var meira að segja búinn að koma Oksönu fyrir í ástarhreiðri þeirra við Sherman Oaks í Kaliforníu," bætti fjölskylduvinurinn við.

Þetta er ekki í fyrsta sinn sem Oksana dregur eldri menn á tálar því hún var eitt sinn ástkona Bond-leikarans Timothy Dalton.