„Evra þýðir innganga í ESB, það sagði ég“

Þorgerður Katrín Gunnarsdóttir varaformaður Sjálfstæðisflokksins segir að Alf Skjeset blaðamaður norska dagblaðsins Klassekampen hafi ekki haft rangt eftir sér í viðtali sem hann tók við hana. Af fréttum í gær mátti skilja að Þorgerður teldi að eina leiðin fyrir okkur væri innganga í Evrópusambandið. Hún segir það hinsvegar eingöngu eiga við peningamálastefnuna því evran verði ekki tekin upp nema með inngöngu.

„Þetta er fínt viðtal hjá honum Alf og ég lagði sérstaka áherslu á að það yrði tekið upp. Ég er nefnilega ekki að segja neitt nýtt. Ég hef sagt að við ættum að fara í aðildarviðræður með þeim fyrirvörum sem snúa að sjávarútvegi og annað," segir Þorgerður í samtali við Vísi.

Þorgerður segir að það sem snúi að peningamálastefnunni hafi verið haft rétt eftir sér en þar hefur hún verið að taka undir með aðalhagfræðingi Seðlabanka Íslands. „Ef við tölum um peningamálastefnuna þá sé ég ekki lausn utan Evrópusambandsins ef við ætlum að taka upp evru. Það er annaðhvort að halda í krónuna eða evra. Og evra þýðir innganga í ESB, það sagði ég," segir Þorgerður.

Hún segir hinsvegar að þýðing Ríkisútvarpsins á frétt Klassekampen síðan í gær þar sem því var haldið fram að hún teldi einu lausnina í okkar málum almennt séð vera innganga í Evrópusambandið ekki vera rétta.