Svæðisskrifstofa málefna fatlaðra braut jafnréttislög

Kærunefnd jafnréttismála hefur komist að þeirri niðurstöðu að Svæðisskrifstofa málefna fatlaðra á Vesturlandi hafi brotið gegn ákvæðum laga um jafna stöðu og jafnan rétt karla og kvenna, þegar karlmaður var ráðinn í starf forstöðumanns Fjöliðjunnar á Akranesi á síðasta ári. Þetta er í fyrsta sinn á þessu ári sem kærunefnd álítur að jafnréttislög hafi verið brotin, og jafnframt fyrsta málið varðandi stöðuveitingu sem hefur unnist fyrir kærunefndinni frá árinu 2006. Þetta kemur fram í frétt á vef Jafnréttisstofu.

Þar segir að tíu umsækjendur voru um stöðu forstöðumanns, þrír karlmenn og sjö konur. Fjórir umsækjendur hafi verið teknir í viðtöl og að þeim loknum hafi karlmaður verið ráðinn í stöðuna. Ein kvennanna hafi kært ráðninguna til kærunefndar jafnréttismála á þeim forsendum að hún væri hæfari en sá sem hafi verið ráðinn.

Í niðurstöðu kærunefndarinnar segir að menntun þess sem starfið hlaut sé umtalsvert minni en kæranda. Þá halli ekki á kæranda hvað starfsreynslu snertir. Huglægt mat á persónulegum eiginleikum þess sem starfið hlaut geti ekki vikið til hliðar hlutlægum mælistikum á borð við sérhæfða menntun og starfsreynslu.

Loks segir kærunefndin að svæðisskrifstofan geti ekki borið fyrir sig vilja til þess að jafna hlut kynjanna í störfum í málaflokknum, þar sem það eigi aðeins við þegar um jafnhæfa einstaklinga sé að ræða. Kærunefndin beini því til Svæðisskrifstofu málefna fatlaðra á Vesturlandi að leitað verði lausna í málinu sem kærandi geti sætt sig við.