Rannsókn á hugsanlegum brotum við fall bankanna þegar hafin

Ríkissaksóknari hefur þegar hafið rannsókn á því hvort refsivert athæfi hafi átt sér stað í tengslum við fall íslensku bankanna.

Það var Björn Bjarnason dómsmálaráðherra sem fól honum það og á fundi með allsherjarnefnd Alþingis í dag greindi ríkissaksóknari frá því í hverju vinnan fælist og hvernig hann sæi fyrir sér umgjörð og innihaldð athugunarinnar.

Að sögn Birgis Ármannssonar, formanns allsherjarnefndar, er um forathugun að ræða á því hvort tilefni sé til að ráðast í opinbera rannsókn á tilteknum þáttum tengdum falli bankanna en sú rannsókn yrði þá hugsanlega í höndum lögeglu eða skattrannsóknarstjóra.

„Málið er hins vegar á frumstigi og því er ekki hægt að segja neitt um þessi atriði nú en það er ljóst að það er allt undir," segir Birgir. Hann segir að fram hafi komið á fundinum með ríkissaksóknara að til þess að hefja opinbera rannsókna á tilteknum þáttum málsins þurfi að vera rökstuddur grunur um tiltekin brot, það sé viðfangsefni undirbúningsvinnu saksóknara að kanna það. Þessi forathugun sé gerð í samstarfi við Ríkisendurskoðun, Fjármálaeftirlitið, Skattrannsóknarstjóra og hugsanlega fleiri aðila. „Ríkissaksskóknari hefur almenna heimild til þess að fylgjast með því hvort um lögbrot sé að ræða og þess vegna er eðlilegt að hann hafi forgöngu um málið," segir Birgir enn fremur.

Ekki möguleiki á frystingu eigna miðað við núgildandi lög

Þingflokkur Vinstri - grænna sendi frá sér yfirlýsingu í dag þar sem lagt var til að kannaðar yrðu lagalegar forsendur þess að hægt verði að kyrrsetja tímabundið allar eignir innlendra fjármálafyrirtækja sem komist hafa í þrot, eigenda þeirra og tengdra aðila hér á landi og setja bann við hvers kyns ráðstöfun, sölu, veðsetningu.

Birgir segir að miðað við núgildandi lög sjái hann ekki möguleika á kyrrsetingu eigna eða lögbanni á tiltekna löggerninga. Þá telji hann erfitt að semja lög þar um „öðruvísi en að setja gerræðisleg lagaákvæði eins og Gordon Brown er að nota í Bretlandi," segir Birgir og vísar þar til ákvörðunar breskra stjórnvalda að setja Landsbankann á hryðjuverkalista.

Birgir telur að mestu máli skipti að rannsakað sé hvort einhverjir hafi farið á svig við lög í tengslum við hrun bankanna og að það sé leitt í ljós eftir eðilegum leikreglum. „Ef einhverjir hafi framið slíkt brot að þá beri þeir bæði fjárhagslega og refsiréttarlega ábyrgð," segir Birgir. Hann bendir til að mynda á að ef það komi í ljós að menn hafi flutt fjármuni úr landi sé hægt að ná þeim til baka.

Birgir segir einnig skipta máli á þessu stigi, og það hafi komið fram á fundi allsherjarnefndar, að gengið sé þannig frá málum að allar upplýsingar séu varðveittar með tryggilegum hætti þannig að ef málin fari lengra og ráðist verði í rannsóknir þá sé hægt að ganga að pappírs- og tölvugögnum. Það sé skilanefnda bankanna að passa upp á þær upplýsingar.