Skotar vilja halda EM 2016

Skoska knattspyrnusambandið hefur sett sig í samband við knattspyrnusambönd Wales og Norður-Írlands um að leggja fram sameiginlegt boð til að halda Evrópumeistaramótið í knattspyrnu í þessum löndum árið 2016.

Skotar höfðu áður lýst yfir áhuga sínum að sækja um að halda mótið. Hins vegar varð ljóst að þegar Knattspyrnusamband Evrópu, UEFA, ákvað að fjölga þátttökuþjóðum í úrslitakeppninni úr 16 í 24 að Skotar gætu einir ekki haldið utan um svo stórt mót.

Skotar og Írar sóttu um að halda EM 2008 en það mót fór fram í Austurríki og Sviss í sumar.

David Taylor, framkvæmdarstjóri UEFA og fyrrum framkvæmdarstjóri skoska knattspyrnusambandsins, segir að það væri góður kostur að halda EM í Skotlandi. Hann var einn þeirra sem sá um boð Skotlands og Írlands á sínum tíma.

„Það væri frábært að halda mótið í Skotlandi en ég verð að tala varlega í þessu samhengi," sagði hann í samtali við skoska fjölmiðla. „Sannleikurinn er sá að mörg aðildarlönd UEFA eru vel hæf til að halda mótið."