Undrast verðmætamat meirihlutans

Óskar Bergsson, borgarfulltrúi Framsóknarflokksins í Reykjavík undrast verðmætamat meirihlutans í borginni. Hann bendir á að eitt glæsilegasta hús landsins, Fríkirkjuvegur 11, hafi verið selt fyrir litlu hærri upphæð en kostaði að greiða fyrir húsin á Laugavegi 4-6. Hann segir blasa við að meirihlutinn hafi notað almannafé til þess að „kaupa ónýt hús fyrir 580 milljónir og fjármagna þau kaup með sölu á einu glæsilegasta og virðulegasta húsi borgarinnar."

Óskar lagði fram bókun í borgarráði Reykjavíkur í gær þegar ákveðið var að taka kauptilboði Novators, sem falaðist eftir Fríkirkjuveginum sem upphaflega var í eigu Thors Jensen, langafa Björgólfs Thors Björgólfssonar.

Í bókuninni segir meðal annars: „Salan á einu glæsilegasta húsi Reykjavíkur vekur upp spurningar um fasteigna- og fjárfestingarstefnu meirihluta F-lista og Sjálfstæðisflokks. Fyrir tæpum þremur mánuðum keyptu þessir flokkar húsin við Laugaveg 4-6 og Skólavörðustíg 1A fyrir 580 milljónir króna. Núna eru þessir sömu flokkar að selja Fríkirkjuveg 11 fyrir 600 milljónir og hestagerðið, sunnan hússins, fyrir 50 milljónir, samtals 650 milljónir."

Í bókuninni segir einnig að færa megi fyrir því rök að kaupin á Laugavegi 4-6 séu fjármögnuð með sölunni á Fríkirkjuvegi 11. „Þegar þessi fasteignaviðskipti eru skoðuð í samhengi þá blasir við að Sjálfstæðisflokkurinn og F-listinn hafa notað almannafé til þess að kaupa ónýt hús fyrir 580 milljónir og fjármagna þau kaup með sölu á einu glæsilegasta og virðulegasta húsi borgarinnar. Þessi samanburður er ömurlegur en því miður staðreynd," segir að lokum í bókuninni.