Hans Petersen stofnar ljósmyndaskóla

HP Farsímalagerinn ehf. sem rekur verslanir Hans Petersen og Farsímalagersins hefur sett á fót Ljósmyndaskóla Hans Petersen sem er staðsettur á netinu.

Kjartan Örn Sigurðsson, framkvæmdastjóri HP Farsímalagersins segir að markmið skólans sé að kenna undirstöðu í ljósmyndavinnslu bæði fyrir áhugafólk um ljósmyndun og eins þeirra sem hyggja á frekara nám í ljósmyndavinnslu.

Kennd eru undirstöðuatriði í myndvinnsluforritum á borð við Photoshop auk almenns og ítarlegs kennsluefnis í ljósmyndun svo og kennsla í notkun einstakra myndavéla.

Ólafur Kristjánsson er skólastjóri Ljósmyndaskóla Hans Petersen en Ólafur, (Óli tölva), er löngu orðinn landsþekktur fyrir að miðla þekkingu sinni á tækjum og tækni í sjónvarpsþættinum: Ísland í bítið, á Stöð 2 og í morgunútvarpinu á Bylgjunni.

Ólafur var kennari í NTV (Nýja Tölvu og Viðskiptaskólanum) og skólastjóri og kennari í Tölvuskólanum Þekking.

Allir geta og mega. Hægt er að skrá sig í skólann á www.hanspetersen.is og fá nemendur þannig 12 mánaða ótakmarkaðann aðgang að ítarlegu kennsluefni í ljósmyndavinnslu. Nemendur geta þannig komið og farið í skólann þegar þeim hentar.

Hans Petersen var formlega stofnað 27. desember 1907. Frá því Hans Petersen hóf sölu á ljósmyndavörum hefur kennsla og námskeið á tækin verið órjúfanlegur hluti af starfsemi fyrirtækisins.