Áfrýjun í Mýrarhúsaskólamáli óákveðin

Ekki hefur verið ákveðið hvort Mýrarhúsaskólamálinu svokallaða verði áfrýjað til hæstaréttar, að sögn Valgeirs Pálssonar, forstöðumanns lögfræðideildar Tryggingamiðstöðvarinnar. Valgeir segir að enn eigi eftir að fara yfir gögn í málinu og ákvörðun um áfrýjun muni ekki liggja fyrir á allra næstu dögum.

Í Mýrarhúsaskólamálinu var móðir telpu við skólann dæmd til að greiða kennara 10 milljónir króna í skaðabætur auk málskostnaðar vegna slyss sem varð þegar telpan skellti hurð á höfuð kennarans með þeim afleiðingum að kennarinn hlaut 25% varanlega örorku. Móðirin var tryggð hjá Tryggingamiðstöðinni sem ber að greiða kennaranum bæturnar samkvæmt dómi héraðsdóms.