Dómarar stígi úr fílabeinsturni sínum

Stjórn Lögreglufélags Reykjavíkur segir nýfallinn dóm í máli þar sem ráðist var á lögreglumenn við skyldustörf hneyksli og spurt er hvort dómarar við Héraðsdóm Reykjavíkur búi í sama samfélagi og lögreglumenn.

Eins og greint var frá í gær voru þrír menn sem ákærðir voru fyrir árás á lögreglumann í miðbænum í janúar sýknaðir í héraðsdómi þar sem ekki þótti sannað að þeir hefðu staðið fyrir árásinni, en tveir félagar þeirra voru einnig á staðnum en voru ekki ákærðir. Einn mannanna var þó sakfelldur fyrir árás á tvo aðra lögreglumenn.

Lögreglufélag Reykjavíkur segir að ef Hæstiréttur komist að sömu niðurstöðu sé það verulegt bakslag í baráttu lögreglumanna gagnvart ofbeldi í starfi. Segir á vef félagsins að dómarinn í málinu ætti að skammast sín. Þar segir einnig að dómarar við Lækjartorg ættu að stíga úr fílabeinsturni sínum og kannski kíkja í miðborgina um helgar og kvöldin til að átta sig á því starfsumhverfi sem lögreglan vinnur í.