Laun hækka um 18 þúsund krónur strax

Forystumenn Alþýðusambandsins og Samtaka atvinnulífsins sættust á þessum fundi í gærkvöldi á útlínur launaliðs nýrra kjarasamninga. Megináherslan er á hækkun lægstu launa og er óhætt að segja að þau hækki verulega, eða um 16 prósent strax og alls um 32 prósent þegar allar hækkanir verða komnar fram eftir tvö ár en gert er ráð fyrir að samningarnir gildi fram til 1. desember 2010.

Almennir launataxtar hækka við undirskrift um 18 þúsund krónur, á næsta ári um 13.500 krónur og um 6.500 krónur árið 2010. Iðnaðarmenn fá meir krónutöluhækkun, eða 21 þúsund strax, en síðan 17.500 og loks 10.500 krónur. Árið 2010 kemur svo almenn launahækkun upp á 2,5 prósent, auk ofangreindra taxtahækkana.

"Baksýnisspegillinn" svokallaði á að tryggja þeim sem ekki nutu launskriðs á síðustu þrettán mánuðum búbót. Þetta ákvæði virkar þannig að ef menn hafa ekki fengið 5,5 prósenta kauphækkun á tímabilinu frá 2. janúar 2007 til undirritunar samninga fá menn það sem á vantar.

Samskonar launaþróunartrygging verður reiknuð 2009 og á að tryggja öllum minnst 3,5% vegna ársins 2008. Þá er gert ráð fyrir fjölgun orlofsdaga um tvo þannig að þeir verði almennt þrjátíu. Samningar eru þó ekki í höfn. Fjöldi sérmála er ófrágenginn og menn vilja sjá framlag stjórnvalda áður en skrifað verður undir.

Seðlabankinn olli samtökum atvinnulífsins verulegum vonbrigðum með því að lækka ekki vexti í morgun. Vilhjálmur Egilsson, framkvæmdastjóri Samtaka atvinnulífsins, sagði í samtali við Stöð 2 að ákvörðun Seðlabankans að halda vöxtunum óbreyttum væri veruleg vonbrigði. Það rofaði aldrei neitt til í Seðlabankanum. Vilhjálmur telur Seðlabankann ekki hafa fært nægileg rök fyrir ákvörðun sinni.