Fimm handteknir í dóphraðsendingamáli

Einn hefur þegar verið úrskurðaður í viku gæsluvarðhald. Farið hefur verið fram á gæsluvarðhald yfir öðrum manni og er úrskurðar að vænta í dag. Seinna í dag mun síðan verða farið fram á gæsluvarðhald yfir þriðja manninum eftir því sem Eyjólfur Kristjánsson hjá lögreglunni á Suðurnesjum tjáði Vísi.

Lagt var hald á 4,6 kíló af amfetamíni og 600 grömm af kókaíni. Rannsókn málsins hefur teygt anga sína víða og sagði Eyjólfur að samstarf lögreglunnar á Suðurnesjum og fíkniefnadeildar lögreglunnar á höfuðborgarsvæðinu hefði verið sérstaklega góð. Að öðru leyti vildi hann ekki tjá sig um málið nema að rannsókn gengi vel.