Ósammála ungliðar í Reykjavík

Ungliðahreyfingarnar keppast nú við að koma skoðunum sínum á nýjum borgarmeirihluta á framfæri. Ungliðahreyfingar vinstriflokkanna segja hátt í þúsund manns hafa komið og mótmælt í Ráðhúsinu í dag.

Heimdellingar segja hinsvegar framkomu þeirra bera vott um ótrúlega óvirðingu gagnvart öllum borgarfulltrúum Reykvíkinga og þeim almennu reglum sem gilda um lýðræðislega meðferð mála í þjóðfélaginu.

Eins og flestum ætti að vera kunnugt um þurfti að stöðva borgarstjórnarfund í dag og rýma áhorfendapalla vegna mikilla láta og mótmæla í garð hins nýja meirihluta.

Hér að neðan má sjá yfirlýsingar frá báðum fylkingunum í heild sinni.

Yfirlýsing frá Heimdalli, félagi ungra sjálfstæðismanna í Reykjavík

„Ungir sjálfstæðismenn í Reykjavík harma framferði ungliðahreyfinga vinstriflokkanna á borgarstjórnarfundinum fyrr í dag. Þótt það sé sjálfsagt að láta í ljós andstöðu sína með mótmælum er ótækt að hindra eðlilegan framgang borgarstjórnarfundar sem var haldinn á löglegan og lýðræðislegan hátt.

Þessi framkoma ber vott um ótrúlega óvirðingu gagnvart öllum borgarfulltrúum Reykvíkinga og þeim almennu reglum sem gilda um lýðræðislega meðferð mála í þjóðfélaginu. Slíkt er hvorki lýðræðinu til framdráttar né til þess fallið að skapa virðingu fyrir ungu fólki í stjórnmálum."

Yfirlýsing frá ungliðahreyfingum Samfylkingarinnar, Vinstri grænna, Framsóknar og ungra stuðningsmanna Margrétar Sverrisdóttur



„Hátt í þúsund Reykvíkingar tóku þátt í mótmælunum sem fram fóru í Ráðhúsi Reykjavíkur í dag. Magnað var að sjá þann fjölda almennra borgara á öllum aldri sem mættu til að láta í ljós hversu mjög Reykvíkingum er misboðið. Ungliðahreyfingunum sem efndu til mótmælanna finnst ekki síst ánægjulegt að sjá hversu margir mættu á eigin vegum til að láta í ljós óánægju sína.

Krafan fyrir fundinn var að hætt yrði við myndun hins nýja óstarfahæfa meirihluta. Hvergi verður kvikað frá þeirri kröfu. Vilja hreyfingarnar beina því til einstaklinga innan nýja meirihlutans, sem nýtur stuðnings innan við fjórðungs borgarbúa samkvæmt nýlegri könnun, að skynsamlegast væri að sjá að sér og hætta við.

Atburðurinn í ráðhúsinu í dag var sögulegur. Bæði var sögulegt að sjá rödd hins almenna borgarbúa mótmæla svo kröftuglega, og því miður var einnig sögulegt að horfa upp hryggilegar aðfarir hins nýja meirihluta. Það er sorglegt að fyrsta verk hins nýja meirihluta hafi verið að þagga niður í þeim sem komu til að tjá skoðun sína á nýjum meirihluta. Við hvetjum alla Reykvíkinga til að sýna áfram samstöðu gegn honum."