Vill reisa minnisvarða um Bobby Fischer við Laugardalshöll

Björn Ingi Hrafnsson óskaði fyrir stundu eftir lausn frá störfum sem borgarfulltrúi Framsóknarflokksins af persónulegum ástæðum eftir að borgarstjórnarfundur hófst á ný. Hann hófst í hádeginu en gera varð hlé á fundinum vegna háværra mótmæla andstæðinga nýs meirihluta.

Björn Ingi þakkaði samstarfsfólkinu gott samstarf og óskaði nýjum meirihluta til hamingju og velfarnaðar. Björn Ingi sagði að nú biði borgarstjórnar að treysta þá mynd sem almenningur hefði af stjórnmálunum. Myndin mætti ekki vera sú að þar væru valdagírugir stjórnmálamenn plottandi í hverju horni. Hvatti hann alla borgarfulltrúa til þess að koma að því.

Þá þakkaði hann samstarfsfólki í borgarráði, ÍTR og Orkuveitunni samstarfið og fyrir að fá að innleiða frístundakort í borginni. Sagðist hann vonast til að borgarráð, sem fundar í dag, myndi samþykkja síðustu tillögu hans um að minnisvarði um Bobby Fischer yrði reistur við Laugardalshöll.

Stjórnmálin munu sakna Björns Inga

Samstarfsfólk hans í borgarstjórn fór fögrum orðum um hann. Þannig sagði Hanna Birna Kristjánsdóttir, borgarfulltrúi Sjálfstæðisflokksins, að þau hefðu átt ótrúlega gott samstarf og sagði að stjórnmálin myndu sakna Björns Inga. Hann væri dugmikill og vissi að tækifærin biðu alls staðar. Þau hefðu ekki alltaf verið sammála en hún vonaðist eftir því að fá að vinna aftur með honum.

Dagur B. Eggertsson, oddviti Samfylkingarinnar, sagði að brotthvarf Björns Inga hefði komið mikið á óvart. Hann væri fyrirferðarmikill maður í pólitík og harður andstæðingu en fáir væru þeir sem jafngaman væri að vinna með. Hann hefði kynnst heilindum Björns Inga í samstarfi þeirra síðustu vikna. Sagði hann missir af Birni Inga úr Tjarnarkvaretettinum.

Gaf Birni Inga flugmiðann með lausa sætinu

Svandís Svavarsdóttir, oddviti Vinstri - grænna, þakkaði Birni einnig samstarfið og sagði hann pólitískt animal sem hefði botnlaust gaman af stjórnmálum. Sagði hún sorglegt að Björn Ingi hefði þurft að þola árásir að undanförnu en hún hefði vonast til að þau myndu mynda vinstri stjórn hinum megin Vonarstrætis. Gaf hún Birni Inga flugmiðann úr flugferðinni til Egilsstaða þar sem sætið losnaði og hún fékk höfuðhögg, að skilnaði.

Borgarfulltrúar samþykktu lausn Björns Inga með öllum greiddum atkvæðum.