Mótmælalisti afhentur á morgun

Þeir sem hafa staðið fyrir undirskriftasöfnun þar sem nýjum meirihluta í Reykjavík er mótmælt hafa boðað þá Vilhjálm Þ. Vilhjálmsson og Ólaf F. Magnússon til fundar í Tjarnarsal Ráðhússins klukkan 11:30 á morgun. „Þúsundir borgarbúa hafa nú þegar undirritað mótmæli vegna ótrúlegra vinnubragða við myndun þessa nýja meirihluta," segir í tilkynningu frá hópnum.

Ekki fylgir sögunni hvort þeir Vilhjálmur og Ólafur hafi boðað komu sína á fundinn en klukkan 12:15 tekur nýji meirihlutinn við stjórn borgarinnar í Ráðhúsinu.

Listann er enn að finna á netinu og þegar þetta er skrifað hafa 4955 skráð sig.