Hátt í 50 skjálftar við Grindavík

Jarðskjálftahrina hófst í Grindavík laust fyrir klukkan tvö í nótt með skjálfta upp á fjóra á Richter. Skjálftarnir í hrinunni eru að nálgast 50.

Stóri skjálftinn fannst greinilega í bænum og hlutir féllu úr hillum. Síðan hafa þónokkrir smærri skjálftar orðið, eða þartil laust fyrir klukkan sex, að annar skjálfti upp á fjóra á Richter varð á sama stað og sá fyrri.

Upptök skjálftanna eru rétt norðvestur af bænum og hefur jörð skolfið áður á þessu svæði. Skjálftarnir í þessari hrinu eru að nálgast 50. Margir Grindvíkingar höfðu samband við Veðurstofuna í nótt og lýstu áhrifum af skjálftunum. Ekki er vitað um tjón á mannvirkjum.