Vonskuveður víða á Vestfjörðum og flughálka á nokkrum stöðum

Vegagerðin varar enn við vonskuveðri á Vestfjörðum og sömuleiðis flughálku á nokkrum stöðum á landinu. Stórhríð á Klettshálsi, Kleifaheiði, Mikladal, Hálfdán og eins á Steingrímsfjarðarheiði en óveðri á Gemlufallsheiði, í Önundarfirði og í Súgandafirði.

Þá er einnig hvasst á Norður- og Austurlandi. Varað er við óveðri í Austur-Húnavatnssýslu og eins á Mývatns- og Möðrudalsöræfum, og einnig á Sandvíkurheiði. Þá er varað við óveðri á Fjarðarheiði og vindsveipum í Reyðarfirði norðan við Fáskrúðsfjarðargöngin.

Vetrarfærð er annars í öllum landshlutum: hálkublettir, hálka eða snjóþekja og víða skafrenningur. Það er helst að vegir séu auðir sumstaðar við Faxaflóa og einnig er að taka nokkuð upp á Suðurlandi.