Starfsmönnum í landvinnslu HB Granda á Akranesi sagt upp

HB Grandi stefnir að því að leggja af landvinnslu botnfisks á Akranesi í núverandi mynd og hefja sérvinnslu á léttsöltuðum, lausfrystum þorsk- og ufsaflökum í byrjun júní næstkomandi. Þetta kallar á að öllum stafsmönnum félagsins á Akranesi verður sagt upp 1. febrúar, alls 59 manns, en tuttugu verða endurráðnir. Fram kemur á heimasíðu HB Granda að þetta sé gert til þess að bregðast við skerðingu á þorkkvóta á núverandi fiskveiðiári.

Stjórnendur HB Granda kynntu áformin á fundi með trúnaðarmönnum starfsfólks í morgun og síðan á almennum starfsmannafundi sem hófst kl. 11 á Akranesi. Stjórn HB Granda tekur endanlega ákvörðun um breytingar á Akranesi á mánudaginn kemur, 28. janúar.

,,Eftir skerðingu aflamarks í þorski hefur botnfiskvinnslan á Akranesi, sem áður snerist um þorsk, verið starfrækt með því að flytja á Akranes hluta þess ufsa, sem ella hefði verið unninn í Reykjavík. Slíkt fyrirkomulag er ekki hagkvæmt. Hins vegar rekur HB Grandi mikilvæga loðnuvinnslu á Akranesi á loðnuvertíð og er nú til skoðunar að efla þá starfsemi, meðal annars með því að gera mögulegt að heilfrysta þar loðnu. Því er nú stefnt að því að leggja af landvinnslu botnfisks í núverandi mynd og hefja á Akranesi sérvinnslu á léttsöltuðum, lausfrystum þorsk- og ufsaflökum í byrjun júní næstkomandi, með tilheyrandi fjárfestingum í tækjum og búnaði. Gert er ráð fyrir að starfsmenn í loðnuvinnslu sinni þessari sérvinnslu utan loðnuvertíðar," segir á vef HB Granda.

Þar segir einnig að þessar ráðstafnir kalli á uppsagnir í landvinnslu á Akranesi. ,,Á launaskrá botnfiskvinnslu HB Granda á Akranesi eru nú 59 starfsmenn í 44 stöðugildum en verða 20 í jafnmörgum stöðugildum í júníbyrjun 2008. Starfsfólki verður sagt upp með fjögurra mánaða uppsagnarfresti, sem rennur því út í lok maímánaðar. Þeir sem lengri uppsagnarfrest hafa fá greitt í samræmi við það, en ekki verður krafist vinnuframlags af þeirra hálfu eftir mánaðamótin maí/júní," segir einnig á vef HB Granda.

Þar segir einnig að stjórn félagsins geri sér grein fyrir að þetta séu alvarleg tíðindi fyrir fjölda fólks sem hafi starfað lengi hjá félaginu og það harmi að til þessa þurfi að koma. ,,Rekstrarumhverfi landvinnslunnar er hins vegar þess eðlis að breytingar eru óhjákvæmilegar í starfseminni með tilheyrandi fækkun starfsfólks. Hópuppsagnir í fiskvinnslufyrirtækjum víðs vegar um land undanfarnar vikur og mánuði segja sína sögu um ástandið í atvinnugreininni. Stjórnendur HB Granda munu eftir megni liðsinna fólki við að komast í vinnu annars staðar," segir að lokum í yfirlýsingunni á heimasíðu HB Granda.

Hugðust flytja alla starfsemi upp á Akranes

HB Grandi greindi frá því á síðasta ári að félagið hygðist hætta allri fiskvinnslu í Reykjavík og flytja hana upp á Akranes þar sem hugmyndin var að reisa nýtt fiskiðjuver. Átti að grípa til þess vegna samdráttar á þorskkvóta. Var óskað eftir samstarfi við Faxaflóahafnir um að flýta uppbyggingu hafnarsvæðis á Akranesi vegna þessa þannig að ný fiskihöfn risi á næsta ári.

Svo kom í ljós að stjórnendur HB Granda vildu fá lóð við Grandagarð við Reykjavíkurhöfn skammt frá starfssstöðvum félagsins en ekki náðist samkomulag um hana milli Faxaflóahafna og fyrirtækisins.

Félagið tilkynnti svo í september að það hefði hætt við að flytja upp á Akranes. Sagði félagið það vegna þess að Faxaflóahafnir hefðu ekki talið sér fært að uppfylla óskir HB Granda um gerð nýrrar fiskihafnar á Akranesi.