Búist við stormi í nótt

Búist er við suðaustan stormi á landinu sunnan- og vestanverðu og á miðhálendinu í nótt samfara asahláku. Veðurhæðin verður mest milli klukkan sex og níu í fyrramálið á þessum svæðum.

Á morgun gengur svo vindstrengurinn yfir landið og má búast við hvassviðri eða stormi víða um land á morgun með vætu í flestum landshlutum. Hiti vex í nótt og á morgun er búist við tveggja til sjö stiga hita á landiinu.

Sigurður Þ. Ragnarsson veðurfræðingur Stöðvar 2 bendir á að snjóalög stífla niðurföll við þessar aðstæður og því rétt að huga að þeim málum fyrir kvöldið.

Í Reykjavík verður veður verst á bilinu milli klukkan sex og níu og má búast við 20-23 metrum á sekúndu. Vindur verður mun hægari nálægt hádegi á morgun.