Þjóðargrafreitur hvíli í friði

Björn Bjarnason, dómsmálaráðherra og formaður Þingvallanefndar, segir að þegjandi samkomulag hafi ríkt um það frá því að hann tók við formennsku í nefndinni fyrir 16 árum að þjóðargrafreiturinn á Þingvöllum fái að hvíla í friði.

Þessi orð lætur Björn í ljós í framhaldi af hugmyndum RJF-hópsins svokallaða, stuðningsmannahóps Bobbys Fischer heitins, um að skáksnillingurinn fái opinbera jarðarför og verði jarðsettur í grafreitnum. Björn segir að á þessum 16 árum hafi ekki verið rætt hvort taka eigi nýja gröf í reitnum en þar hvíla nú þegar Jónas Hallgrímsson og Einar Benediktsson.

,,Össur Skarphéðinsson sagði réttilega í útvarpsviðtali, að vel færi á því, að Skáksamband Íslands stæði að útför Bobbys Fischers, vilji hans nánustu, að hann sé jarðsettur hér á landi," bætir Björn svo við á heimasíðu sinni.