Borgarbúar duglegir að flokka ruslið

Minna magn af óflokkuðu heimilissorpi mældist í tunnum borgarbúa árið 2007 heldur en 2006 að því er fram kemur í tilkynningu frá Umhverfissviði Reykjavíkurborgar. „Þetta eru tíðindi því magnið hefur aukist ár frá ári þangað til núna," segir Guðmundur B. Friðriksson skrifstofustjóri Skrifstofu neyslu og úrgangs á Umhverfissviði.

Árið 2006 var heildarmagn á óflokkuðu sorpi úr heimilistunnunum 27.186.420 kg en árið 2007 var það 27.135.573 kg. Óflokkað heimilissorp hefur því dregist saman um 50 tonn. Íbúafjöldi í Reykjavík var 116.446 þann 1. desembe. árið 2006 en 117.721 þann 1. desember árið 2007.

Íbúunum hefur því fjölgað um 1.275 í borginni eða 1,1%. Sorpmagn hvers íbúa hefur því minnkað úr 233 kg á íbúa í 231 kg á íbúa á ári sem er um 1% minnkun. Í tilkynningunni segir að þrátt fyrir að minnkunin sé ekki veruleg teljist þetta góður árangur sé horft til þess að magnið hefur aukist jafnt og þétt milli ára og að ekki hefur dregið úr neyslu almennings.

„Ég tel helstu ástæðu þessa samdráttar felast í aukinni flokkun borgarbúa og skilum á endurvinnslustöðvar og í grenndargáma," segir Guðmundur og nefnir einnig vinsældir Endurvinnslustunnunnar og Bláu tunnunnar. Hann segir að aukning á magni á flokkuðum úrgangi fyrir allt árið 2007 hafi enn ekki verið reiknuð þar sem tölurnar liggi ekki fyrir en tölur hvers mánaðar gefa vísbendingu um aukningu.